O río Tea recuperará con frondosas o seu bosque de ribeira en 15 quilómetros

O río Tea recuperará con frondosas o seu bosque de ribeira en 15 quilómetros

Recuperar a vexetación propia das marxes do río Tea ao longo de 15 quilómetros, os que separan Salvaterra e Ponteareas polo río, é a pretensión da actuación prevista pola Consellería de Medio Ambiente para inicios de 2020 e que está valorada en máis de 50.000 euros.

Os traballos previstos permitirán conservar e recuperar as árbores de primeira liña das marxes do Tea e consolidalas mediante a plantación de salgueiros e frondosas. Ao mesmo tempo, eliminaranse especies alóctonas (invasoras); principalmente falsa acacia, arce con follas de freixo, ailanto, mimosa e bambú xigante. Por último, efectuaranse traballos para a retención de derribas ou desprendementos de noiros que se puideron ver afectados polas crecidas.

Este proxecto de recuperación executarase nos catro próximos meses por un centro especial de emprego de iniciativa social, co fin de facilitar unha oportunidade laboral a persoas de colectivos de difícil inserción.
A actuación enmárcase dentro do proxecto denominado Migra Miño-Minho, que lidera a Dirección Xeral de Patrimonio Natural, que conta con fondos Feder, co que se busca mellorar a protección e conservación do hábitat fluvial da sub-bacía do tramo internacional do río Miño, desde o encoro de Frieira, en Crecente, ata a súa desembocadura en A Guarda-Caminha.

Por tanto está considerada unha acción que mellorará a protección e a xestión sustentable dun espazo natural de fronteira con Portugal de alto valor ecolóxico e que conta con espazos incluídos na Rede Natura 2000.

Fonte: Faro de Vigo